Hipun Urip Leng Melegah.

Shalom  anak-anak  Tuhan,  salam  cerdas  bengsak  kui.

Sayu peji kelenghi katuk Tuhan levi anih, Tuhan masi itam lim.

Paen jagak ageh, paen ngiyoh SOP leng kenan pelitah, paen peji sayu dahin kelunan bangu.

Batang  katuk leng uk geri avan tam piyah pelemanak levi anih hak nah “Hipun Urip Leng Melegah”- “Hipun Urip Leng Melegah” ayat nak uk ala men alem Injil Yohanes 10:10;- Injil Yohanes 10:10;

Unak akui basak nak halem dahun terjemahan Lembaga Alkitab Indonesia, dahun ayat anan nunih;  “Pencuri datang hanya untuk mencuri dan membunuh dan membinasakan; Aku datang, supaya mereka mempunyai hidup, dan mempunyainya dalam segala kelimpahan.”

Jadi akui na nak halem dahum tam ngeluwak; “Kelunan nako ney bekak ney nako dahin lematey dahin petasak tua; Akui ney, bey dahak hipun urip, dahin hipun nak halem lim naan ateng nyuwek.”

Halem ayat anih tek duwak naan kelunan aleng ney, kelunan anan ihak nah; ke-ji Kelunan nako dahin ji laan hak tih Tuhan Yesus. Dahawak ney piyah-piyah hipun tavit; bi tavit dahawak ney jan samak. Kelunan nako anan ney – ney nako dahin ney lematey dahin ney petasak. Tuhan Yesus ney – ala dahak hipun urip dahin seng hipun urip atih halem lim naan ateng nyuwek.

Urip nunok leng kurin Tuhan Yesus halem ayat anih?

Tek telok naan gi urip halem dahun Yunani leng tek en ngalong halem Alkitab ataupun halem bup tepra Tuhan. Ji, ha tih leng dahak gi “Bios” bios anan selitak marung joh biologis “ano urip” atau “ket megunah mejoh urip”, ji nguwak hak tih en dahak gi “Psukhe” Psukhe hak nah jiwa, Jiwa anan hak nah hengak leng tek ha alem batung kelunan leng megak joh henoh (perasaan) dahin pelemanak (pikiran). Psukhe anan selitak marung  joh 'keberadaan', 'hidup alamiah', jiwa ataupun hengak anan deh hak nah ajek urip leng tek ha alem batung kelunan, bi hengak deng padek dahin deng pata tegu jakak kelunan atih matey, jadi psukhe anan jan nak paen, nak haman jiyo. Ji laan leng en dahak gi “Zoe” jadi Zoe anan hak nah urip leng sejati,urip leng paen, urip leng melegah ataupun urip leng berkualiti, bukan kualiti liva, bi berkualiti meran bo, urip leng seng en dahak hipun ngejeloh ney Tuhan Yesus anan, anan nah bareik urip Tuhan Yesus, anan nah urip leng en Tuhan Yesus gi halem ayat anih.

Dahak leng en Tuhan Yesus pala dahin leng ala Ihak halem urip dahak, dahak seng hipun urip (zoe) anan, dahak jan hipun nak nunan tua, bi dahak hipun nak halem lim naan. Halem lim naan anan, leti nak bukan selitak joh hipun reta leng lebak, bukan na lung joh hipun aran hipun nama, hipun aren ha usun tana, bi lebak naan atih selitak joh kenep leng penu kenan lebak masem kenep-kenep leng sayu, kenep-kenep leng sayu anan, leng en bup tepara Tuhan kumak; “buah roh” (halem surat Galatia 5:22-23) bara nunih; “…buah Roh ialah: kasih, sukacita, damai sejahtera, kesabaran, kemurahan, kebaikan, kesetiaan, kelemah-lembutan, penguasaan diri”, Anan nah sin-sin kenep leng sayu. Ihak mejoh ngeruwak dahun nak “Tidak ada hukum yang menentang hal-hal itu”. Dahak leng lan-lan hipun Tuhan Yesus halem urip dahak, hipun kenep leng penu kenan kenep-kenep leng sayu, jinun tek adet leng seng mukum dahak, avin nun? Tavit urip dahak hangan kenan kenep-kenep leng sayu, nyangan ateng nyuwek. Ket leng nyuwek kurin Nak tinih, tentu ket atih u melebih, musang nising men hungun nak. Leti  dahun ayat anan  marung joh nyuwek anan, hak nak nunih, hi hi tua kelunan leng hipun urip melegah anan kenep dahak penu,kenep dahak hangan, hangan ateng nyuwek kenan kenep-kenep leng sayu, kelunan leng hipun kenep leng sayu tentu adet dahak sayu,dahun dahak sayu,kelanyat dahak sayu, tepafara leng musang men ba dahak peh, tefara leng sayu. Adet-adet leng sayu anan deng en tak hineng men bareik dahak putung do, dahak  jadi ji kelunan leng  luwa, leng  tangen, leng maang, leng tuto leng jinun hipun kenep nyalam usun tana anih laan, dahin dahak deng bara nunih; “usun tana anih jan nak avan uma kui” nun tavit dahak den na dahok nunan? Tavit kenep dahak u en dahak udey tey ha daleh leng maring,pikil dahak u en dahak udey tey ha usun ha seluga, ha shamayim tih, halem Kolose 3:2 “ Pikirkanlah perkara yang di atas, bukan yang di bumi”.

Hi hi leng nerimak Tuhan Yesus seng hipun urip anan, urip leng sejati urip leng berkualiti. Nunok urip leng berkualiti, urip leng melegah anan? Urip berkualiti atau urip leng melegah anan hak nah urip leng mejam urip Tuhan Yesus jarun Ihak murip jadi kelunan ha usun tana 2000 lebih duman leng u lalo deh. Tuju itam ala adet sebayang Kristen anih hak nah anan, ala itam hipun urip mejam urip Tuhan Yesus murip tegu ihak ney pebaluk kelunan tegu jakak anan deh. Ikem hipun urip berkualiti anan? Katah nah Tuhan Yesus, murip nah mejam Tuhan Yesus murip. Behi tek tek hang tam leng tek  jam Tuhan Yesus, pehendey tua mavuk putung do, mavuk nah itam lim piyah ihak, bi Tuhan Yesus jinun hipun bareik leng ngeluto mavuk putung do nunan, jadi asun sekali- kali itam na bareik leng nunan, behi peh tek tek hang tam leng habung Tuhan Yesus ngetuyang hawan kelunan,sayu itam ngetuyang  piyah Ihak, bi Tuhan Yesus jinun ngetuyang hawan kelunan jadi asun sekali-kali itam na nunan.

Tuhan Yesus ihak ji kelunan aleng nyeten, itam mesti nyeten piyah Ihak, halem Injil Matius 13:55  kumak nunih, “Bukankah Ia ini anak tukang kayu?...”, nun tavit dahak mejui Ihak nunan? Tavit dahak tentu tek nyineng Tuhan Yesus na hadui tukeng anan dahin Yusuf taman amung nak.  Tuhan Yesus tegu ihak nyam, Ihak nyeten sekulah, nyeten belajar jadi itam peh mesti nunan, halem Injil Lukas 2:52 bara “Dan Yesus makin bertambah besar dan bertambah hikmat-Nya…”, jinun tek pengjam, jinun tek ugek, jinun tek haman kelunan haman nabah behi dahak jinun sekulah dahin jinun belajar, jadi Tuhan Yesus men umol nyam nak ateng Ihak umol 30 duman Ihak sekulah. Ihak nyalam lim kelunan, nurey peh itam lahu nyalam nah lim kelunan; halem Injil Yohanes 13:34 bara “ Aku memberikan perintah baru kepada kamu, yaitu supaya kamu saling mengasihi; sama seperti Aku telah mengasihi kamu demikian pula kamu harus saling mengasihi”. Hipun bareik leng sayu, tangen halem urip, hipun kenep tuto pehalam ji dahin ji dahin kenep len teneng anan nah urip leng melegah, urip leng berkualiti, zoe menjam tuk gi Nak halem ayat Yohanes 10:10 anih.

Asun hapan tavit pekenep seng hipun heling usun tana anih, asun ngawing kenep kak tavit kajo tebelip usun tana anih, behi itam em mayeng urip tam,pekatah urip Tuhan Yesus, itam seng gak nako. jan nun leng en tam hipun tua seng padek, bi urip tam peh seng padek pata jan en habung laan. Avin ket leng ney nako anan bukan ney nako tua, bi ihak seng lematey itam, dahin melenyoh petasak urip tam.

Usun tana leng kerey anih seng en nutung ji do baya, en nutung dahin lim-lim ket leng leket tek nak. Behi kenep tam jepalit leket tek usun tana anih, itam peh en nutung dahin nak, anan nah tuju ket leng ney nako anan ney, ala itam em hipun urip leng melegah anan, tegu itam em hipun zoe anan itam sajak jinun avan ha alem daleh Tuhan.

Petengayet nah na mejam dahun ajal bup tepara Tuhan, hipun nah urip leng kudus maang mejam Tuhan Yesus, tangen nah halem urip kak, udey kenep kak tey ha Langit maring dahin usun tana maring leng mejam halem bup Tuhan bara, behi anan en tam na itam seng hipun Urip Leng Melegah urip leng berkualiti, mejam urip Tuhan Yesus leng hipun atey puti,

“ketalokui pala Tuhan, akey Tuhan ngelutuk ita halem kuasa nak, em tey pegey ayo leng ney na bego usun tana jakak anih, akey Tuhan puboh dahin mayak itam tegu itam musang men amin tey ilo ava,nurey peh tegu itam mutam uli ngeluwak, bey nah Tuhan masi itam,sayu halem hadui,halem sekulah,halem bisnes, dahin lim-lim ket leng sayu leng en tam na. dahin akui akey ja putung luung  tam leng tek peji kelenghi katuk Tuhan levi anih,seng  hipun urip leng melegah, Amen”. deng anih katok Tuhan levi anih Tuhan memberkati.